फाष्टन एक्सनको आर्थिक सहयोग, नरहरिनाथ गाउँपालिकाको समन्वय तथा सहकर्मी समाजको सहजीकरणमा सञ्चालित सम्मान परियोजना अन्तर्गत नरहरिनाथ गाउँपालिका वडा नं. ४ मा पहिलोपटक समुदायको लगानीमा वृक्षारोपण कार्यक्रम सम्पन्न भएको छ।
गोठी टोलमा आयोजित कार्यक्रममा दलित तथा गैरदलित समुदायको संयुक्त सहभागितामा “लालीगुराँस रानी वन” क्षेत्रमा वृक्षारोपण गरिएको हो। गत जेठ १२ गते बसेको दलित र गैरदलित समुदायको भेलाले लालीगुराँस रानी वन स्थापना तथा वृक्षारोपण गर्ने निर्णय गरेअनुसार कार्यक्रम सम्पन्न गरिएको जनाइएको छ।
नरहरिनाथ गाउँपालिका वडा नं. ४ का वडा सदस्य रमाने बुढाको अध्यक्षतामा सम्पन्न कार्यक्रममा ४५ जनाभन्दा बढी स्थानीयको सहभागिता रहेको थियो। कार्यक्रममा बाज, दल्लो, निगालो, पुलम, बयस, गुराँस, किमु, आरु, उर्तिस, मेल र पैयाँ गरी ११ प्रकारका विरुवा रोपिएको छ।
कार्यक्रममा वडा सदस्य रमाने बुढा, वडा सदस्य नरेन्द्र बहादुर सहकारी, दलित महिला सदस्य राजु दर्जी तथा लालीगुराँस रानी वनका अध्यक्ष रामबहादुर बुढाको विशेष उपस्थिति रहेको थियो।
सहभागीहरूले वातावरण संरक्षण, हरियाली प्रवर्द्धन तथा सामुदायिक एकता मजबुत बनाउन वृक्षारोपण अभियान प्रभावकारी हुने विश्वास व्यक्त गरेका थिए। स्थानीय समुदायको सक्रियता दलित–गैरदलितबीचको सहकार्यले कार्यक्रमलाई थप उदाहरणीय बनाएको सहभागीहरूले बताएका छन्।
कार्यक्रम आयोजकहरूले वृक्षारोपण जस्तो सामाजिक तथा वातावरणीय महत्वको अभियानमा सहभागी भई सहयोग गर्ने सम्पूर्ण वडा नं. ४ का जनसमुदायप्रति आभार व्यक्त गरेका छन्।
सोही कार्यक्रमको सहजीकरण सामुदायिक प्रशिक्षक मानबहादुर विश्वकर्माले गर्नुभएको थियो।
